काठमाडौं । राष्ट्रिय प्रजातन्त्र पार्टीले उपराष्ट्रपति निर्वाचनमा पनि मतदान नगर्ने भएको छ । बुधबार बसेको पार्टीको केन्द्रीय कार्यसम्पादन समितिको बैठकले ३ चैतमा हुने उपराष्ट्रपति निर्वाचनमा पनि मतदान नगर्ने निर्णय गरेको प्रवक्ता मोहन श्रेष्ठले जानकारी दिए । यसअघि २५ फागुनमा भएको राष्ट्रपति निर्वाचनमा पनि राप्रपाले मतदान गरेको थिएन । राष्ट्रपति तथा उपराष्ट्रपति निर्वाचनका लागि राप्रपाका १४ संघीय सांसद र २८ प्रदेशसभा सदस्य मतदाता छन् ।
राप्रपाले रासायनिक मलमा दिएको अनुदान कटौती गर्ने सरकारको निर्णयलाई अदूरदर्शी, अमानवीय र अनुचित भनेको छ । यो निर्णय तत्काल फिर्ता लिन, सुलभ ढंगले मल आपूर्तिको व्यवस्था मिलाउन र देशभित्रै मल कारखाना स्थापना अघि बढाउन राप्रपाले माग गरेको छ । राप्रपाले मलका विषयमा पार्टीको ७७ वटै जिल्ला समितिले एक हप्ताभित्र प्रमुख जिल्ला अधिकारीमार्फत सरकारलाई ज्ञापनपत्र बुझाउने, धर्ना दिने र विरोध सभा गर्ने निर्णय पनि गरेको प्रवक्ता श्रेष्ठले बताए ।
राप्रपाले बैंक तथा वित्तीय संस्थाहरुले ऋणीसँग उठाइरहेको ब्याजदर तत्काल नियन्त्रण गर्न अस्वाभाविक रुपमा बढेको ब्याज घटाउन र देशको वित्तीय सन्तुलन कायम गर्न पनि सरकारको ध्यानाकर्षण गराएको छ ।
हेर्नुहोस् राप्रपाको प्रेस वक्तव्य
