काठमाडौं । नेकपवा एकीकृत समाजवादीले गठन गरेको वामपन्थी एकता वार्ता कार्यदलसँग भेट्दै नेता घनश्याम भूसालले तीनबुँदे प्रस्ताव बुझाएका छन् । भूसालले आफ्नो प्रस्तावमा लेखेका छन्, – एमाले र माओवादी दुवैले इतिहासलाई आफ्नो आफ्नो संकीर्णतामा व्याख्या गर्न थाले । एकीकृत समाजवादीले उक्त जडताबाट मुक्त हुने कोसिस गरेको छ ।
उनले लेखेका छन्, ‘इतिहासमुखी होइन, भविष्यमुखी भएर आन्दोलनका बारेमा सोच्ने हो भने त्यो वैभव असाधारण अवसर पनि हो । इतिहासमा भएका सबै उपलब्धी र कमजोरीहरु हाम्रा साझा विरासत हुन् भन्ने चेतनाले हामीलाई एकताको धरातलमा उभ्याउन सक्छ ।’ उनले चुनावको ठक्करबाट निराश हुन नहुने, बरु व्यक्तिगत लाभहानि नहेरी क्रान्तिका लागि क्रान्तिकारी पार्टी बनाउनुपर्ने उल्लेख गरेका छन् । भूसालले संसद विघटनको फेरि पनि आलोचना गर्दै एमालेलाई नवौं महाधिवेशनभन्दा पछि फर्कन लागेको आरोप लगाएका छन् ।
भूसालले आफूसँग एकताका लागि छलफल गरेको भन्दै कार्यदललाई धन्यवाद दिँदै उक्त प्रस्ताव पठाएका हुन् । एकीकृत समाजवादीले उनका यी प्रस्तावउपर छलफल गरी छिटै जवाफ दिने बताएको छ । ‘मैले आफ्ना विषयलाई उल्लेख गरी उहाँहरुलाई दिएको छु, विचार र कार्यक्रममा हामी एक ठाउँमा स्पष्ट भएर उभिन सक्दा अघि जाने बारे सोच्न सकिन्छ भन्ने कुरा हो,’ भूसालले भने, ‘त्यस हिसाबले हाम्रो छलफल सकारात्मक दिशामा अघि बढेको छ ।’ आफूलाई कुनै पद दिने या लिनेबारे छलफल नभएको भन्दै भूसालले पहिले नीतिमा सहमति बन्नुपर्ने बताए ।
नेकपा एकीकृत समाजवादीसहित तत्कालीन सत्ता गठबन्धनको समर्थनमा भूसाल स्वतन्त्र उम्मेदवारका रुपमा गत प्रतिनिधिसभा चुनावमा उठेका थिए । उनलाई एमालेका छविलाल भुसालले रुपन्देही १ मा पराजित गरेका थिए । भूसाललाई समर्थन गर्ने गठबन्धनका नेता पुष्पकमल दाहाल प्रचण्डलाई भने एमालेले प्रधानमन्त्री प्रस्ताव गरेपछि राजनीतिक उतारचढाव भएको छ, जबकि एमालेबाट टिकट नपाएपछि तत्कालीन स्थायी कमिटी सदस्य भूसाल पार्टीबाट बाहिरिएका थिए ।
