बैकुण्ठ गिरी, अमेरिका ।
अमेरिकाको न्युयोर्क देखि बाल्टिमोर जादै गर्दा झण्डै २ सातादेखि बेपत्ता पर्वत कुश्माका २२ बर्षीय युवा अमन खान सकुशल भेटिएका छन् । उनी न्युजर्सीमा फेला परेको प्रहरीले उनी निकटका व्यक्तिलाई जानकारी दिएको थियो ।
उनले आफू मेरिल्याण्डमा आइसकेपछि लुटिएको र लुटेराहरुले मोबाइल, झोला लगायतका सबै सामानहरु लुटेकाले कसैलाई सम्पर्क गर्न नपाएको बताएका छन् ।
कसैको पनि नम्बर याद नभएकाले कसैलाई सम्पर्क गर्न नसकेको र पछि प्रहरीको सम्पर्कमा पुगेपछि एलियन नम्बर बताउँदा प्रहरीको त्यसको माध्यमबाट स्पोन्सरको सम्पर्क नम्बर फेला पारेपछि सम्पर्क हुन सकेको उनले जानकारी दिए ।
आफू लुटिएपछि सार्वजनिक बसहरु चढ्दै र हिड्दै उनी न्युजर्सीको इष्ट विन्डसर पुगेको बताएका थिए । पर्वतको कुश्मा नगरपालिका वडा नम्बर ५ वडगाउँ शिवालयका २२ बर्षिय खान अप्रिल २७ शनिबारविहानदेखि सम्पर्कविहिन भएका थिए ।
छोरा सम्पर्कविहीन भएपछि पर्वतको कुश्मामा रहेका अमनका बुवा अश्लम चिन्तित हुँदै खोजीका लागि सघाउन अमेरिकामा रहेको नेपाली समुदायलाई आग्रह गरेका थिए । त्यसपछि उनको मेरिल्याण्ड, वासिंटन डिसी लगायतका क्षेत्रमा खोजी गरिएको थियो । छोरा भेटिएपछि बुवाले सबैलाई खोजी कार्यमा सहयोग गरकोमा धन्यवाद भनेका छन् ।
समाचार सहयोगी पुनम बसेल ।
