काठमाडौँ, माघ ८–शिक्षक सेवा आयोगले माध्यमिक तह, तृतीय श्रेणी शिक्षक पदको खुला प्रतियोगितात्मक परीक्षाका लागि खुला गरेको विज्ञापनमा अहिलेसम्म ४१ हजार भन्दा बढीले दिएका छन् ।
आयोगले पुस ८ गते खुला गरेको विज्ञापन नियमित शुल्कमा आवेदन दिने आज अन्तिम रहेकोले आवेदकको संख्यामा वृद्धि भइरहेको आयोगले जानकारी दियो । आवेदन दिने मध्ये ३५ हजार ६ सय ९० ले आवेदन शुल्क बुझाएका छन् भने बाँकी रहेकाले आज बेलुकासम्म बुझाउन मिल्ने भएकोले आवेदकको संख्या अझै बढ्ने आयोगको भनाई छ ।
आयोगको लिखित परीक्षामा सहभागी हुने उम्मेदवारहरूले २०८० माघ ८ गतेसम्म सिंगल दस्तुर र माघ १५ गतेसम्म अविलम्ब (दोब्बर) शुल्कमा परीक्षा आवेदन दरखास्त फाराम भर्न सक्नेछन्। त्यसैगरी शिक्षक पदमा खुला तथा समावेशी प्रतियोगितात्मक परीक्षाद्धारा स्थायी पदपूर्तिका लागि ४ सय ५१ पद सङ्ख्यामा आवेदन माग गरेको छ । साथै नेपाली विषयका लागी ७०, अङ्ग्रेजीका लागि ८१, गणितका लागि ८८, विज्ञानका लागि १२६, सामाजिकका लागि ५६, अर्थशास्त्रका लागि ७, कार्यालय सञ्चालन तथा लेखा विषयका लागि १७, संस्कृत व्याकरणका लागि ३ र कम्प्युटर विज्ञानका लागि ३ पद सङ्ख्यामा आवेदन माग गरेको छ ।
