पर्वत । कुश्मा नगरपालिका स्तरीय तेस्रो राष्ट्रपति रनिङ्ग शिल्ड प्रतियोगिता बिहीवारदेखि बडागाउँ खेल मैदानमा शुरु भएको छ । तीन दिनसम्म संचालित प्रतियोगितामा नगर भित्रका २५ वटा विद्यालयका झण्डै पाँच सय विद्यार्थीले विभिन्न विधामा प्रतिस्पर्धा गर्ने भएका छन् । विद्यार्थीहरूले प्रतिस्पर्धा गर्ने प्रतियोगितामा भलिबल, कबड्डी, दौड, रिले, हाई जम्प, लङ जम्प, ट्रिपल जम्प, ज्याइभलिन थ्रो, कराँते र तेक्वान्दो विद्याभित्रका विभिन्न समूहमा प्रतिस्पर्धा हुने छ ।
विभिन्न २७ प्रकारका खेलहरूमा छात्र र छात्रातर्फ गरेर कुल ५४ स्वर्ण, ५४ रजत र ५४ कांस्य पदकका लागि विद्यार्थीहरूले प्रतिस्पर्धा गर्नुपर्ने छ । जुन विद्यालयले सबैभन्दा बढी स्वर्ण पदक जित्ने छ सोही विद्यालय विजेता बन्ने छ ।
उद्घाटन कार्यक्रम बोल्दै नगरप्रमुख जोशीले स्वास्थ्यका लागि खेलकुद अनिवार्य रहेको बताउनुभयो । विद्यार्थीभित्र रहेको प्रतिभा र क्षमतालाई प्रस्फुटन गर्नका लागि यस्तो प्रतियोगिताको महत्वपुर्ण भूमिका रहने बताउँदै यसलाई विशुद्ध विद्यार्थीको प्रतिभासँग जोडेर हेर्न आग्रह गर्नुभयो । कतिपय विद्यालयहरुले जसरी पनि आफ्नो पक्षमा नतिजा पार्न सक्रियता बढाईरहेको बेला नगरप्रमुख जोशीले बिद्यालयको गरिमासँग नजोडिकन विद्यार्थीलाई निष्पक्ष रुपमा प्रतिस्पर्धा गर्न लगाउन आग्रह गर्नुभयो ।
हरेक वर्ष संचालन हुने राष्ट्रपति रनिङ्ग शिल्ड प्रतियोगितालाई भव्य र सभ्य रुपमा सम्पन्न गर्नका लागि नगरपालिकाले आवश्यक सहयोग गर्ने उहाँको भनाई छ । जोशीले खेल क्षेत्रको विकासका लागि नगरपालिका विभिन्न संघ संस्थाहरुसँग पनि सहकार्य गरेर अघि बढ्न तयार रहेको बताउँदै खेलक्षेत्रको विकासवाट पनि नगर र समग्र मुलुकको विकासमा टेवा पुर्याउन सकिने बताउनुभयो ।
चालु शैक्षिक सत्रमा माध्यमिक विद्यालयको कक्षा १२ सम्म नियमित रूपमा अध्ययनरत साथै विद्यालयको इमिश रेकर्डअनुसार १८ वर्षभन्दा मुनिका छात्र,छात्राहरू मात्रै प्रतियोगितामा सहभागी हुन पाउने छन् । कुश्मा नगरपालिकाले लगातार तीन पटक ‘राष्ट्रपति रनिङ शिल्ड’ प्रतियोगिता जित्ने विद्यालयलाई पाँच लाख रुपैयाँ पुरस्कार दिने घोषणा पहिलो संस्करणको रनिङ शिल्ड आयोजना गर्ने बेलामा भइसकेको छ ।
कार्यक्रममा जिल्ला समन्वय समिति पर्वतका उपप्रमुख सोम जिसी, कुश्मा नगरपालिकाका प्रमुख प्रशासकिय अधिकृत नेत्र पौडेल, वडा नं। ६ का अध्यक्ष इश्वर गिरी लगायतले बोल्नुभएको थियो । कार्यक्रमको स्वागत शिक्षा उपसमिति संयोजक तथा वडा नं। १४ का वडा अध्यक्ष रुद्रमोहन रिमालले गर्नुभएको थियो भने संचालन नगर शिक्षा अधिकृत दिपक सुवेदीले गर्नुभएको थियो ।
