काठमाडौं । आफ्ना सबै छिमेकीहरुसँग सम्बन्ध खराब बनाएको भारतलाई अब बंगलादेशले पनि जोडदार धक्का दिएको छ । नागरिकता संशोधन ऐन (सीएए) लागू भएपछि मात्र भारत र बंगलादेशबीचको सम्बन्ध बिग्रन थालेको थियो । नेपाल, चीन र पाकिस्तान पछि, अब भारत र बंगलादेशको बीचमा विवाद बढ्ने देखिएको छ ।
बंगलादेशको एक अखबारले दावी गरेको छ कि बंगलादेशी प्रधानमन्त्री शेख हसीनाले गएको चार महिनादेखि भारतीय उच्चायुक्तलाई भेट्न समय दिइनन् । भारतीय अधिकारीहरुले बारम्बार बैठकको माग गरे पनि भारतीय उच्चायुक्तले अनुमति पाइरहेका छैनन् ।
मिडिया रिपोर्टका अनुसार बंगलादेशको एक अखबार भोरर कागोसेले भनेका छ, ‘सन् २०१९ मा शेख हसीना दोस्रो पटक प्रधानमन्त्री भएदेखि सबै भारतीय परियोजनाहरु सुस्त भएका छन् । यसको कारण उनको पाकिस्तान र चीनतर्फ झुकाव बढेको छ ।’ भारतको आपत्तिका बाबजुद बंगलादेशले सिल्हेटमा रहेको एयरपोर्ट टर्मिनलको निर्माण ठेक्का चीनियाँ कम्पनीलाई प्रदान गरेर भारतलाई जोडदार जवाफ फर्काएको छ ।
भारतीय उच्चायुक्त रेवा गांगुली चार महिनादेखि बंगलादेशका प्रधानमन्त्रीलाई भेट्ने कोशिश गर्दैछन् तर अहिलेसम्म समय पाएका छैनन् । यति मात्र होइन, बंगलादेशले कोरोना भाइरसको महामारीलाई रोक्न सहयोग गरेकोमा भारतलाई धन्यवादसम्म पनि भनेको छैन । बुधबार पाकिस्तानका प्रधानमन्त्री इमरान खानले बंगलादेशका प्रधानमन्त्री शेख हसिनासँग कुरा गरेका थिए ।
