प्रहरी हिरासतमा रवि लामिछाने समर्थकले नुवाकोटका पत्रकार शालिकराम पुडासैनी आत्महत्या प्रकरणको अनुसन्धान प्रभावित पार्न खोजेको भन्दै चितवनमा प्रदर्शन भएको छ ।
शनिबार प्लेकार्डसहित अनुसन्धान प्रभावित हुने गरी दबाब नदिन भन्दै स्वतन्त्र युवा समूहका नाममा भरतपुरको चौबीसकोठीमा प्रदर्शन गरेका हुन् ।
प्रहरीले आत्मत्याका लागि दुरुत्साहन गरेको अभियोगमा लामिछाने, उनको कार्यक्रम ‘सिधा कुरा जनतासँग’ मा कार्यरत युवराज कँडेल र ओखलढुंगाकी युवती अस्मिता कार्कीलाई राजधानीबाट पक्राउ गरी चितवन लगेको छ । जिल्ला अदालतले चिवतनले शुक्रबार पक्राउ परेका तीनैजनालाई थप पाँच दिन थुनामा राखेर अनुसन्धान गर्न प्रहरीलाई अनुमति दिएको थियो ।
त्यसविरुद्ध राजधानीबाट गएका लामिछाने समर्थकले भरतपुरमा प्रदर्शन गर्नुका सार्थ जिल्ला प्रहरी कार्यालय चितवनमा ढुंगामुढा गरेका थिए । त्यस क्रममा पाँच प्रहरी घाइते भएका छन् । प्रदर्शनका सहभागीले ‘ ‘निष्पक्ष छानविन गर्न देऊ’, ‘अपराधलाई राजनीतिकरण नगरौं’, ‘पुडासैनीले न्याय पाउनैपर्छ’ ‘दोषीलाई कारबाही होस्’, ‘एनजीओको हस्तक्षेप बन्द गर’ लगायत नारा लगाएका थिए ।
