काठमाडौं ।नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले प्रधानमन्त्री केपी शर्मा ओलीले देश र जनताको हितमा सिन्को नभाँचेको टिप्पणी गरेका छन् ।
आज (शनिबार) मकवानपुरको थाहा नगरपालिकाको वाईसीएलको अधिवेशनलाई सम्बोधन गर्दै उनले आफू प्रधानमन्त्री भएको बेला गरेको कामको फेहरिस्त वर्तमान सरकारले आफ्नो लिस्टमा राखेको आरोप लगाए । उनले प्रधानमन्त्री केपी शर्मा ओलीले सरकारको एक सयदिने प्रगतिमा प्रचण्ड नेतृत्वको निवर्तमान सरकारले गरेको कामलाई घुसाएको बताए ।
‘सय दिनको उपलक्ष्यमा प्रधानमन्त्री केपी शर्मा ओलीले पढेको वक्तव्य सुन्नुभयो होला– मैले गरेको जति काम सबै आफूको बनाएछन् तिनले । उनले त यहाँ आएपछि सिन्को भाँचेका छैनन् । सय दिनमा गरेको भनेर जे फेहरिस्त पेश गरे, त्यो माओवादी केन्द्र नेतृत्वको सरकारले गरेको कामको लिस्ट बनाएछन् र यो मैले गरेको भने,’– प्रचण्डले भने ।
पूर्व प्रधानमन्त्रीसमेत रहेका प्रचण्डले ओलीले माओवादीले गरेको काममा पनि दाबी गर्दा प्रतिवाद नगरेको भन्दै नेता तथा कार्यकर्तासँग असन्तुष्टि व्यक्त गरे ।
