पर्वत । गत विहिबार राती आएको भिषण बर्षातका कारण गएको पहिरोका कारण अहिले मध्य पहाडी लोकमार्गको पर्वत खण्ड पूर्ण रुपमा अवरुद्ध छ । पहिरोले झण्डै ७ किलोमिटर सडकका विभिन्न ठाउँमा अवरुद्ध बनाएपछि यो सडकमा सवारी आगमन बन्द भएको छ । सडक बन्द भएसंगै मध्यपहाडी लोकमार्ग आयोजना कार्यालयले सडक खुलाउने काम भने शुरु गरीसकेको छ ।
जिल्ला प्रहरी कार्यालय पर्वतले दिएको जानकारी अनुसार आइतबार साँझसम्म कुश्मा देखि चुवासम्मको पहिरो हटाइएको छ । एक तर्फी सवारी चल्न सक्ने गरी पहिरो हटाइएको हो ।
मध्य पहाडी लोकमार्ग आयोजना कार्यालय पर्वतका कार्यालय प्रमुख इन्जिनियर मेघराज मरासिनीका अनुसार अहिले सडकमा ७ वटा ठूला मेसिनले पहिरो हटाउने काम गरीरहेका छन् । एक तर्फी बाटो खुलाउने गरी काम भइरहे पनि पहिरो निकै ठूलो गएका कारण समस्या परेको मरासिनीको भनाईछ ।
आयोजना प्रमुख मरासिनीका अनुसार मंगलबार भ्याप्ले खण्डको पहिरो हटाउनका लागि बम विस्फोट गर्ने गरी तयारी गरिएको छ । बम विस्फोट गराउने कार्यका लागि सोमबार होल खोलिने र मंगलबार विहान बम विस्फोट गरिने आयोजना प्रमुख मरासिनीले जानकारी दिए । मौसमले साथ दिए मंगलबार बेलुकासम्म एकतर्फी सडक सञ्चालनको तयारी भइरहेको मरासिनीको भनाई छ ।
पहिरोका कारण निर्माणधिन मध्यपहाडी लोकमार्गमा ठूलो क्षति पुगेकोछ । लामा कन्ट्रक्सनले निर्माण गरीरहेको उक्त सडक हस्तान्तरण नगर्दै ठूलो क्षति भएको छ ।
आयोजना प्रमुख मरासिनीले सडकको सवै संरचना निर्माण गर्दा २५ देखि ३० करोड रकम लाग्ने पूर्वानुमान गरिएको बताउँछन् । सडकलाई मापढण्ड बमोजीमकै अवस्थामा निर्माण गर्न ठूलो रकम लाग्ने भएका कारण आयोजनाको निर्माण कार्य थप प्रभावित हुने देखिएको छ ।
