काठमाडौं । धेरैलाई प्रधानमन्त्री केपी शर्मा ओलीको सेन्स अफ ह्युमरका बारेमा जानकारी छ । उहाँ समय र परस्थिति अनुसार व्यवहार गर्न सक्नुहुन्छ । यस्तै मंगलबार सकिएको १३औं दक्षिण एसियाली खेलकुद(साग) पदक जित्ने खेलाडीलाई प्रधानमन्त्री ओलीले सरकारी निवास बालुवाटारमा बोलाएर पुरस्कार घोषणा गर्दा पनि देखिएको छ ।
आज दिउँसो भएको कार्यक्रममा प्रधानमन्त्री ओलीले पौने घन्टा सम्बोधन गर्नुभएको थियो । सम्बोधनका क्रममा उहाँले खेलाडीहरूको उपलब्धिको प्रशंसा गर्दै भविष्यमा सरकार थप सेवा सुविधा दिने कुरामा सकरात्मक भएको बताउनुभयो । आत्मविश्वास भन्दा ठुलो कुरा केही नभएको भन्दै खेलाडीहरुलाई उहाँले हौसला दिनुभयो ।
प्रशिक्षकहरूलाई सगरमाथा चढाउने शेर्पाहरूसँग तुलना गर्दै प्रधानमन्त्री ओलीले खेलाडीको सफलतामा प्रशिक्षकको भूमिका महत्वपुर्ण रहने स्पष्ट पार्नुभयो । यो बीचमा सागमा पौडीतर्फ ४ स्वर्ण जितेकी कीर्तिमानी खेलाडी गौरिका सिंहलाई स्मरण गर्दै उहाँले आफ्नो किस्सा सुरु गर्नुभयो । उहाँले आफू पनि पौडीबाज भएको बताउनुभयो । उहाँले भन्नुभयो, ‘म गौरिकालाई बताउन चाहन्छु, म पनि एउटा स्विमर हो । म पनि ठूल्ठूला बगेका खोलाहरू पुल, डुंगाबाट होइन खोलाबाटै तरिदिन्थें ।
हाम्रो समयमा स्विमिङ पुल चाहिँदैनथ्यो । खोलासँग राम्रो जानपहिचान भइसक्याथ्यो त्यसकारण बगाउँदैनथ्यो। धेरैपल्ट म बग्दाबग्दै बगाउनबाट जोगिएको छु किनभने पौडी खेल्न जानेको र सिकेको हुनाले।’ यो सँगै उहाँले कास्य पदक जित्नेहरुलाई हौसला प्रदान गर्नुभएको छ । उहाँले कास्य पदक पनि स्वर्ण र रजतजस्तै भएको तर दुई जना अगाडी गएको मात्रै भएको भन्नुभयो ।
