काठमाडौ । लुम्बिनी पुगेका नेकपा एमालेका अध्यक्ष केपी शर्मा ओलीले बसको सफर गरेका छन् । उनी पार्टीको कामले सो क्षेत्रमा पुगेका हुन् । ओली मंगलवार तिलोत्तमाको मणिग्रामबाट विद्युतीय बस चढेर भैरहवा हुँदै लुम्बिनी पुगेका छन् ।
सुन्दर यातायात प्रालि, बुटवलले विद्युतिय बस सञ्चालनमा ल्याएको छ । सो विद्युतीय सार्वजनिक बसको उद्घाटन गरेका ओलीले ५५ किलोमिटर यात्रा पनि बसमै गरेका हुन् । उनी बस चढेर भैरहवा, लुम्बिनी हुँदै पुनः भैरहवा विमानस्थलमा पुगेका हुन् ।
ओलीसँगै एमाले उपाध्यक्ष तथा पूर्व अर्थमन्त्री विष्णु पौडेल, राष्ट्रिय सभा सदस्य गोपाल भट्टराई, प्रदेश सभा सदस्य लीला गिरी, भूमिश्वर ढकाल, बुटवल उपमहानगरपालिकाका प्रमुख शिवराज सुवेदी पनि थिए । उनीहरुले पनि ओलीसंगै बसको यात्रा गरे ।
लुम्बिनीमा आयोजित पार्टीको जनसभा तथा पार्टी प्रवेश कार्यक्रमलाई सम्बोधन गरेर उनी भैरहवा विमानस्थलसम्म आएका थिए । उनले त्यहाँ दुई सांसद सहित थुप्रै नेता कार्यकर्तालाई एमालेमा प्रवेश गराएका छन् ।
बस यात्रा गरेसँगै ओलीले विद्युतीय बस चल्ने जस्तै यस क्षेत्रका सडक लोभलाग्दा रहेको बताए । ‘नेपाल अब आधुनिकतातर्फ गइसक्यो,’ ओलीले भने, ‘अब यस्तै गाडी चलाउनुपर्छ । अब प्रदूषणरहित बस चलाउनुपर्छ, जसले हामीलाई व्यापार घाटा पनि कम गर्छ ।’ अहिले बुटवल–भैरहवा सडक ६ लेनको बनेको छ ।
प्रालिका सञ्चालक घिमिरेले नेपालमै पहिलो विद्युतीय सार्वजनिक बस यस क्षेत्रमा भित्राइएको बताए । बस ५० सिट क्षमताका रहेका छन् । बस सुविधासम्पन्न रहेको घिमिरेको भनाइ छ ।
