काठमाडौं । नेकपा (एमाले)ले अमेरिकी सहयोग मिलेनियम च्यालेन्ज कर्पोरेशन (एमसीसी)बारे उपयुक्त समयमा निर्णय लिने स्पष्ट पारेको छ । विहीबार नयाँ बानेश्वस्थित संसद भवनमा माओवादी केन्द्रका अध्यक्ष पुष्पकमल दाहाललगायत नेताहरुसँगको छलफलमा एमाले अध्यक्ष ओलीले एमसीसीबारे उपयुक्त समयमा निर्णय लिने स्पष्ट पारेका हुन् ।
उक्त छलफलमा माओवादी केन्द्रका अध्यक्ष दाहालले एमाले अध्यक्ष ओलीलाई एमसीसीको विषयमा जिज्ञासा राखेका थिए । छलफलपछि सञ्चारकर्मीसँग कुरा गर्दै एमाले उपाध्यक्ष सुवास चन्द्र नेम्वाङले अध्यक्ष ओलीले एमसीसीबारे उपयुक्त समयमा निर्णय लिने जानकारी दिएको जनाएका हुन् ।
अध्यक्ष ओलीको भनाइ उद्धृत गर्दै नेम्वाङले भनेका छन्, ‘माओवादी अध्यक्षलगायतका नेताहरुसँग सकारात्मक छलफल भयो । तर, एमसीसीबारे उपयुक्त समयमा मात्र निष्कर्षमा पुग्छौं ।’
उक्त छलफमा माओवादी केन्द्रका तर्फबाट अध्यक्ष पुष्पकमल दाहाल, नेताहरु नारायणकाजी श्रेष्ठ, देव गुरुङ र शक्तिबहादुर बस्नेत सहभागी छन्, भने एमालेका तर्फबाट अध्यक्ष केपी शर्मा ओली, नेताहरु सुवासचन्द्र नेम्वाङ, ईश्वर पोखरेल, विष्णु पौडेल थिए ।
