काठमाडौं । नेपालले आफ्नो भूमि समेटेर मुलुकको राजनीतिक तथा प्रशासनिक नक्सा अद्यावधिक गरेपछि केही विवादमा कोहीको तारिफ भइरहेको छ । कूटनीतिक माध्यम र वार्तामार्फत सीमा विवाद समाधान नगरी पेलेर भारत अघि बढ्न थालेपछि नेपाल सरकारले पनि आफ्नो भूमिको रक्षार्थ नक्सालाई अद्यावधिक गरेको छ । नेपालको भूमिमा बनाएको बाटो भारतले यही मे ८ मा उद्घाटन गरेसँगै दुई मुलुकबीच विवाद बढेको हो ।
भारतले वार्तालाई लत्याएपछि नेपाल सरकारले पनि मे २० मा लिम्पियाधुरा, कालापानी र लिपुलेक समेटेर नक्सा जारी गरेको छ । यही बेलामा नेपालको नक्सा जारीकोमा सरकारलाई धन्यवाद दिएकी अभिनेत्री मनिषा कोइरालाको भारतमा विरोध भए पनि नेपालमा तारिफ भयो ।
वार्ताबाट समाधान गर्न छोडेर समस्या बढाउन नहुने अभिव्यक्ति दिने नायिका वर्षा राउत विवादम परिन् । तर, यही बेला एक युवकको तस्बिर भाइरल बनिरहेको छ । कैलालीका सुरेश चौधरीको तस्बिर अहिले भाइरल बनिरहेको हो ।
उनले भारतको दिल्लीगेट अगाडि कालापानी र लिपुलेक नेपालको पर्छ, भारतमा होइन’ उल्लेख गरिएको प्लेकार्ड बोकेर उभिएको तस्बिर अहिले भाइरल बनिरहेको हो । जुन तस्बिर हालसालै नभएर केही महिना अघिको रहेको हो । भारतले गत नोभेम्बर २ मा नेपालको लिम्पियाधुरा, कालापानी, लिपुलेकलाई समेटेर नक्सा जारी गरेपछि सो तस्बिर रहेको हुन सक्नेछ ।
