बिरामी छन् भन्दैमा प्रधानमन्त्री केपी ओलीले सबै कुराको ‘हो’ मा ‘हो’ मिलाउँछन् भन्ने छैनमात्र हैन, अनुमानभन्दा ठीक उल्टो, गत क्याबिनेट बैठकभरि उहाँ आक्रोशित मुद्रामा पेश भए । मन्त्रीहरू छक्क परे । मिर्गौलाको नियमित डायलोसिसपछि अघिल्लो सोमबार बसेको अहिलेसम्मकै सबभन्दा लामो (चार घण्टाको) क्याबिनेट बैठकमा प्रधानमन्त्री आफ्ना मन्त्रीहरूप्रति अत्यन्तै आक्रोशित र असन्तुष्ट देखिएका थिए ।
उनले हालै सम्पन्न मन्त्रिपरिषद् पुनर्गठनमा केहीलाई निरन्तरता दिएर तीन महिनाको ग्रेसमार्क दिइएको बताउँदै बिदा हुन मन भए मार्गप्रशस्त रहेको बताए । उनको भनाइ थियो, ‘सरकारको कार्यकाल दुई वर्ष पुग्न लागेको बेला मिडियाले थुप्रै कुरा लेखेका छन् । कतिपय सन्दर्भ आलोचनात्मक, आक्रोशपूर्ण र अतिरञ्जित हुनसक्छन् । तर, केही प्रसंग मिलेका पनि छन् । मन्त्रीहरूको कार्यशैली, कार्यसम्पादन, प्रस्तुति चित्त नबुझ्दो भएको कुरामा म पनि सहमत छु ।’
कार्यशैलीमाथि टिप्पणी गर्दै प्रमले केही उदाहरण पेश गरे । वर्षाको बेला तराईमा बाढी आउने, त्यसले कटान गर्ने, बस्ती डुबाउने प्रसंग निकाल्दै भने, ‘यो सबैलाई जानकारी भएको कुरा हो । त्यसलाई ध्यानमा राख्दै अहिलेदेखि नैै किन उपाय नखोज्ने ? जब वर्षा आउन लाग्छ, तब नदीका दायाँबायाँ बालुवाका बोरा लगेर छोपछाप पार्ने र बजेट सक्ने प्रबृत्ति छ ।’ उनले प्रधानमन्त्री रोजगार कोषमा पर्याप्त रकम भएको भन्दै ‘पैसाको चिन्ता छैन, जनतालाई प्रत्यक्ष राहत पुग्ने काममा त्यसलाई सदुपयोग गर्न सकिनेतर्फ सबैको ध्यानाकर्षण होस् । अहिल्यैदेखि बाँस ठड्याएर, रुख रोपेर बाढीको खतरा न्युनिकरण गर्न सकिने ठाउँ छ तर, मन्त्रीहरूको ध्यान पुग्दैन । कर्मचारीलाई काम लगाउन सकिएको छैन । अब यस्ता कुरा सह्य हुँदैनन्’, बैठकमा तीतो पोखे ।
उनले कड्किएर भने, ‘प्रत्येक मन्त्रीसँग कार्यसम्पादन सम्झौता गरिएको छ । अब मलाई देखिने गरी परिणाम चाहिन्छ । मन्त्री हुने अनि एमसिसीजस्तो परियोजनाको विरोध पनि गर्ने ? यो कुरा सह्य हुँदैन । एमसिसीबारे सरकारको धारणा सार्वजनिक गर्न मन्त्रिपरिषद् कार्यालय या परराष्ट्रको आयोजनामा पत्रकार सम्मेलन गर्ने कुरा थियो । तर, कृषि मन्त्री घनश्याम भुषालले ‘पहिला संसदीय दलमा छलफल गरौँ, दलभित्रै एकमत कायम गरेपछि पत्रकार सम्मेलन पनि गर्नुनपर्ला’ भन्ने कुरा उठाए । उनले भने, ‘हाम्रो संसदीय दलभित्रै यसबारे प्रष्ट धारणा राख्ने र त्यहीअनुसार जाने भनिएपछि यसबीच जति पनि विरोध र विवादका स्वर आएका छन्, तिनलाई मत्थर पार्न सांसद, मन्त्री सक्रिय हुन्छन् । त्यसपछि व्यक्तिलाई दपेट्ने कुरै भएन ।’ तर, प्रमले ‘एमसिसी पास हुन्छ, जसरी पनि गर्नैपर्छ’ भन्दै कुराको बिट मारे ।
जनआस्था साप्ताहिकबाट भिडियो हेर्न यहाँ क्लिक गर्नुहोस् । subscribe मा क्लिक गरेपछि सँधै भिडियो हेर्न पाईनेछ । नजिकैको बेल (घण्टि) मा थिचे अपलोड गर्नासाथ पहिलो दर्शक बन्न पाउँनुहुनेछ ।
