काठमाण्डौ । नेकपामा प्रधानमन्त्री केपी शर्मा ओलीको इतर समूहको रुपमा रहेको पुष्पकमल दाहाल प्रचण्ड र माधवकुमार नेपाल समूहले अहिलेसम्मकै ठूलो प्रदर्शन गर्ने निर्णय गरेको छ । उक्त समूहले माघ २८ गतेका लागि प्रदर्शनको मितिसमेत तय गरेको छ ।आज पेरिसडाँडामा बसेको नेकपा केन्द्रीय संघर्ष समितिले आन्दोलनलाई अझ शसक्त बनाउने निर्णय गरेको नेता विष्णु रिजालले जानकारी दिए। बैठकलाई सम्बोधन गर्दै प्रचण्ड–नेपालले संविधान, लोकतन्त्र, गणतन्त्र, संघीयता र समानुपातिक प्रणालीको रक्षाका लागि आन्दोलन अपरिहार्य रहेकाले जनपरिचालन विकल्प नरहेको उल्लेख गरे।
पुस ५ गते प्रधानमन्त्री ओलीले असंवैधानिक रुपमा प्रतिनिधिसभा विघटन गरेपछि नेकपाको दाहाल नेपाल पक्षले चरणबद्ध आन्दोलनका कार्यक्रम गर्दै आएका छन्। उनीहरुले संसद पुनःस्थापनाको विकल्प नभएको बताउँदै देशव्यापी विरोध प्रर्दशन र आमसभा आयोजना गर्दै आएका छन्। यसअघि माघ ९ गते नेपाल दाहाल पक्षले काठमाण्डौमा सरकारको गैर संवैधानिक कमदका विरुद्ध प्रर्दशन गरेको थियो।
