काठमाडौं । सत्तारुढ दल नेपाल कम्युनिष्ट पार्टी (नेकपा) ले लामो समय भैसक्दासम्म सभामुख कस्लाई बनाउने भन्ने टुंगो लगाउन सकेको छैन । यस विषयमा नेकपाको सचिवालय बैठक पटकपटक प्रधानमन्त्री निवास बालुवाटारमा बस्दै आएको छ । आज पनि बैठक चलिरहेको जानकारी दिइएको छ । बैठकमा राष्ट्रियसभा निर्वाचनको उम्मेदवार र सभामुख पदको उम्मेदवार छनोटका विषयमा छलफल हुने जानकारी दिइएको छ ।
यस विषयमा बिहीबारको सचिवालय बैठकमा पनि छलफल भएको थियो तर कुनै निष्कर्ष निस्किएन । राष्ट्रियसभाको १८ सिटमध्ये दुई सिट राष्ट्रिय जनता पार्टी (राजपा)लाई दिने सहमति भएकाले नेकपाले १६ सिटका लागि उम्मेदवार टुङ्ग्याउनुपर्छ । बिहीबारको बैठकमा सभामुख पदको उम्मेदवार छनोट गर्ने विषयमा छलफल नभएकाले आजको बैठकमा चर्चा हुने भनिएको छ ।
नेकपाबाट तत्कालीन सभामुख कृष्णबहादुर महरा यौ’न दुर्व्यवहारको आरोपमा पक्राउ परेपछि सभामुख पद खाली छ । सभामुख छनोट गर्न नसक्दा संसदको हिउँदे अधिवेशनसमेत प्रभावित भएको छ । अहिले चर्चामा पूर्वएमालेबाट सुवास नेम्वाङ र पूर्वमाओवादीबाट अग्नि सापकोटा रहेका छन् । जानकारी अनुसार महरा पुर्व माओवादी भएको हुँदा यो पटक पनि पुर्व माओवादी हुनसक्ने सम्भावना धेरै छ ।
