पर्वत । जिल्लाको जलजला गाउँपालिकाले वडा वडामा पुगेर जनताको गुनासो सुन्ने गरी सञ्चालन गरेको सार्वजनिक सुनुवाई कार्यक्रम अन्तर्गत २ वडामा उक्त कार्यक्रम सम्पन्न भएको छ ।
स्थानीय तहको सुशासन, सामाजिक उत्तरदायित्व, पारदर्शिता र जवाफदेहिता भन्ने नारा लिएर गाउँपालिका सवै वडाका स्थानीयसंग दोहोरो अन्तरसम्बाद गर्दैछ । अभियान अन्तर्गत जलजला गाउँपालिका वाड नं ५ लेखफाट र वाड नं ६ शालिजामा सार्वजनिक सुनुवाई कार्यक्रम सम्पन्न भएको छ ।
जलजला गाउँपालिका कार्यालय र वडा कार्यालयबाट आ.व. २०८०/८१ को २०८० चैत मसान्तसम्म भए गरेका विकास निर्माण एवं सेवा प्रवाह सम्बन्धमा सार्वजनिक सुनुवाई कार्यक्रमको आयोजना गरिएको हो ।
कार्यक्रममा जलजला गाउँपालिका अध्यक्ष राजु प्रसाद आचार्य, उपाध्यक्ष दिपक आचार्य वाड नं ५ का अध्यक्ष तिलक जिसि, वडा न ६ का अध्यक्ष बल बहादुर पुर्जा पुन, प्रमुख प्रशासकीय अधिकृत फडिन्द्र प्रसाद आचार्यले सेवा प्रवाह र आयोजनाहरुको विषयमा सेवाग्राहीले सोधेको प्रश्नको जवाफ दिएका थिए ।
सार्वजनिक सुनुवाई कार्यक्रममा स्थानीयले सडक, कृषि, शिक्षा र पूर्वाधारका विषयमा प्रश्नहरु सोधेका थिए । गाउँपालिकाले वडाहरुमा चालु आर्थिक बर्षमा सञ्चालन गरेका आयोजनहरुको विषयमा प्रगति प्रतिवेदन पेश गरेको थियो ।
सार्वजनिक सुनुवाई कार्यक्रमको सहजीकरण लालटिन मिडिया प्रालिका कार्यकारी निर्देशक सुमन थापा गरेका थिए ।
