पर्वत । संगै जंगलमा तरुल खोज्न गएका २ युवा मध्ये पर्वतको मोदी २ देउपुरका १ युवाको हत्या भएको छ । आइतबार दिउँसो मोदी २ देउपुर टापुको स्थानीय सामुदायिक वनमा तरुल खोज्न गएका दुई युवा मध्ये ४० बर्षका उदय रिजालको हत्या भएको प्रहरीले जनाएको छ । आज आइतबार तरुल निकाल्ने क्रममा विवाद हुँदा स्थानीय प्रेमबहादुर नेपालीले तरुल खन्नका लागि प्रयोग गरेको रड प्रहार गर्दा सोही स्थानका उदय रिजालको ज्यान लिएका हुन् ।
जंगलमा फेला परेका रिजाललाई पर्वत अस्पतालमा उपचारका लागि ल्याउँदा चिकित्सकले मृत्यु घोषणा गरेकोे जिल्ला प्रहरी कार्यालय पर्वतका प्रहरी निरिक्षक अविनाश दिप जिसीले पुष्टि गरे । घटनामा घाइते भएका अर्का झण्डै ४० बर्षका श्रीराम शर्मालाई उपचारका लागि पोखरा पठाइएको जिसीले जानकारी दिएका छन् ।
घटनामा संग्लन्न ३५ बर्षका प्रेमबहादुर नेपालीलाई प्रहरीले नियन्त्रणमा लिएको छ । प्रहरी निरिक्षक जिसीका अनुसार दिनभर जसो संगै रहेका उनीहरु मध्ये हत्याका अभियुक्त नेपालीले पुरानो रिसिबीका कारण रिजालको हत्या गरेको प्रारम्भिक बयान दिएका छन् । रिसिबीको कारण भने खुल्न सकेको छैन ।
