SuchanaKendra

  • Radio Kushum


  • सुचनाकेन्द्र संवाददाता प्रकाशित : २०७९/६/६ गते
    १२३ &#२३४६;&#२३३५;&#२३२५;

    काठमाडौं । सोमबार साँझ साढे ६ बजे गोठाटारमा लाल मोहम्मद मारिनेवित्तिकै अनुसन्धान अधिकृतहरुले नजिकै रहेको क्लोज सर्किट (सीसी) क्यामराकाे फुटेज हेरेर अनुसन्धान सुरु गरे । आसपासका व्यक्तिहरुमाथि सोधपुछ पनि एकसाथ भइरहेको थियो । त्यहीबीच हत्यामा संलग्न व्यक्ति घटनास्थलबाट तीनसय मिटर पर रहेको कोशीपारि गेष्ट हाउसमा बसेको सूचना प्रहरीले पायो । अनुसन्धानमा संलग्न एक अधिकृतका अनुसार होटलमा गएर कर्मचारीसँग सोधपुछ गर्दा शंकास्पद व्यक्ति ‘जितेन खान’को नाममा बसेको देखियो । जिल्ला प्रहरी परिसर, टेकुको टोलीले होटलको सीसीटीभी फुटेज मगाएर हेर्‍यो, त्यहाँ ‘जितेन’ सँगै अरु दुुईजना पनि देखिए । ‘जो व्यक्तिको नाममा होटलमा कोठा लिइएको थियो, उनी पहिल्यै देखेका व्यक्ति जस्तै थिए’, ती अधिकृत भन्छन्, ‘एउटा पुरानो केशमा पनि खोजी भइरहेको जस्तो लागेपछि भेरिफाइ गरेका थियौं ।’ प्रहरीका अनुसार झण्डै एक वर्षअघि न्यूरोड क्षेत्रबाट हुण्डीको ७० लाख रुपैयाँ लुटपाट भएको थियो । त्यही घटनाको सिलसिलामा जिल्ला प्रहरी परिसर काठमाडौं र प्रहरी वृत्त जनसेवाले उनको खोजी गरिरहेको थियो ।

    यो पनि पढ्नुहोस
    लाल मोहम्मद हत्याले सम्झाएको १४ वर्ष पुरानो गोलीकाण्ड
    स्रोतका अनुसार घटनाका पीडित पनि प्रहरी परिवारकै सदस्य थिए । त्यसैले पनि प्रहरीले लामो समयसम्म अनुसन्धान गरेको थियो । तर ती व्यक्ति भेटिएका थिएनन् । अनुसन्धानको सिलसिलामा ती व्यक्तिको दाइसम्म प्रहरी पहिल्यै पुगेको थियो । ‘उनै भएको शंका लागेपछि फेरि दाइलाई भेटेर सीसीटीभी फुटेज देखाउँदा उनले ती व्यक्ति आफ्ना भाइ नितिन मदन भएको बताइदिए’, प्रहरी वरिष्ठ उपरीक्षक (एसएसपी) जनकराज भट्टराई नेतृत्वको अनुसन्धान समितिका एक सदस्य भन्छन्, ‘सीसीटीभी फुटेजमा भएको दृश्यका व्यक्ति नितिन भएको पुष्टि भएपछि प्रहरीले उनको कल डिटेल रेकर्ड (सीडीआर) निकालेको थियो ।’ सीडीआरमा नितिनको लाल मोहम्मदसँग पनि सम्पर्क भएको देखिएको स्रोतको भनाइ छ । प्रहरी स्रोतका अनुसार उनको रसुवा कारागारमा रहेका खुंखार अपहरणकारी उदय सेट्ठीसँग पनि सम्पर्क देखिएको छ । सेट्ठी मुम्बईको अन्डरवर्ल्ड डन छोटा राजन समूहका एक सदस्य हुन् । स्रोतका अनुसार सेट्ठी र मदनबीच नियमित सम्पर्क हुने गरेको देखिएको छ । मदनले एकजना साथीसहित रसुवा गएर जुत्ता, कपडा लगायतका सामग्री सेट्ठीलाई दिएको पनि पाइएको छ । यसले उनीहरुबीच सम्बन्धको घनिष्ठतालाई देखाउने अनुसन्धानमा संलग्न एक अधिकृत बताउँछन् ।

    यो पनि पढ्नुहोस
    लाल मोहम्मद हत्यामा अन्डरवर्ल्ड डन छोटा राजन समूह जोडियो
    टेलिफोनमा पनि नियमित कुराकानी भएको देखिएको छ । प्राविधिक पक्षको विश्लेषणबाट प्रहरीले घटना अगाडि दुई सुटर र मदनबीच होटलमा भेट भएको देखिएको बताएको छ । मदनले नै हतियार व्यवस्थापनदेखि रेकी गर्ने लगायतका काम गरेका थिए भन्ने कुरा यकिन भइसक्यो,’ जिल्ला प्रहरी परिसर, काठमाडौंका एक अधिकृत भन्छन्, ‘प्राविधिक पाटोको अनुसन्धानबाट उनले प्रयोग गरेका केही व्यक्तिहरुको पनि पहिचान खुलिसकेको छ ।’ यद्यपि, प्रहरीले घटनामा संलग्न अन्यको परिचय खुलाएको छैन । पहिचान खुले पनि घटनामा संलग्न व्यक्तिहरुलाई हालसम्म पक्राउ गर्न सकेको छैन । प्रहरी स्रोतका अनुसार लामो समयदेखि नेपाल बसे पनि उनको घर भारतको हरियाणा हो । उनले नेपाली महिलासँग विवाह गरेका छन् । स्रोतका अनुसार उनकी पत्नी अहिले दिल्लीमा छिन् । न्यूरोडमा रहेको कोठामा दाइ र आमा मात्रै छन् । प्रहरीका अनुसार उनी लुटपाट र जुवामा पनि जोडिएका व्यक्ति हुन् । स्रोतका अनुसार उनले क्यासिनोमा पनि उल्लेख्य पैसा डुबाएका थिए । उनको र उदय सेट्ठीबीच कसरी चिनजान भयो भन्ने खुलेको छैन । उदयसँग सोधपुछ गर्न अनुसन्धान अधिकृतको एक टोली जिल्ला कारागार रसुवातर्फ गएको छ ।

    यो पनि पढ्नुहोस
    फैजानदेखि लाल मोहम्मद काण्ड : नेपालमा रअ र आईएसआईबीच ‘प्रोक्सी वार’
    मदनले घटना हुनुअघि प्रयोग गरेको एउटा मोटसाइकल प्रहरीले बरामद गरेको छ । विगतमा लाल मोहम्मदलाई पछ्याउन त्यो मोटरसाइकल प्रयोग भएको हुनसक्ने प्रहरीको आशंका छ । हालसम्म घटनामा प्रयोग भएको मोटरसाइकल चाहिँ बरामद भएको छैन । हरिवन नगरपालिका–२, सर्लाहीका लाल मोहम्मद सोमबार अपराह्न गार्मेन्टका लागि प्लास्टिक लिन जोरपाटी गएका थिए । फर्किएर बा ६ च ५१५२ नम्बरको कारमा आउँदा निस्किनेबित्तिकै आँगनमा एक व्यक्तिले उनीमाथि गोली बर्साएका थिए । रातो सर्ट र जिन्स पाइन्ट लगाएका युवकले उनलाई कार वरिपरि लखेटेर गोली हानेको सीसीटीभी फुटेजमा पनि देखिन्छ । गम्भीर अवस्थामा प्रहरीले मोहम्मदलाई शंखरापुर अस्पताल लगेको थियो । अस्पतालले आधा घन्टामा त्रिवि शिक्षण अस्पताल, महाराजगञ्ज रिफर गरिदियो । शिक्षण अस्पतालमै उनको मृत्युको घोषणा भयो ।

    यो पनि पढ्नुहोस
    फिल्मी शैलीमा मारिएका लाल मोहम्मद : जसको पृष्ठभूमि नक्कली नोट कारोबारसँग जोडिन्छ
    यो घटना हुनुअघि पनि मोहम्मदमाथि आक्रमणको प्रयास भएको थियो । त्यसैले उनले २५ भदौमा आफू असुरक्षित भएको भन्दै प्रहरी बिट जम्मुडाँडामा निवेदन दिएका थिए । घटनाको अनुसन्धानका लागि प्रहरी प्रधान कार्यालय नक्सालले उपत्यका अपराध अनुसन्धान कार्यालय, बानेश्वरका एसएसपी जनक भट्टराईको नेतृत्वमा पाँच सदस्यीय समिति बनाएको छ । जाली नोटसँग पृष्ठभूमि जोडिने र भारतको खुफिया एन्जेसीको वान्टेड सूचीमा रहेका निष्कर्षसहित अनुसन्धान समितिले पेशेवर अपराधीको प्रयोगबाट मोहम्मदको हत्या भएको हुनसक्ने आशंका गरेको छ ।

    प्रतिकृया दिनुहोस्

    Loading...

    क्यान पर्वतको पाँचौ अधिबेशन सम्पन्न, अध्यक्षमा अच्युत पौडेल

    पर्वत ,कम्प्युटर एशोसिएसन नेपाल महासङ्घ (क्यान महासंघ) पर्वत शाखाको पाँचौ अधिबेशनले अच्युत पौडेलको अध्यक्षतामा नयाँ...

    बाजुराबाट प्रदेशसभामा एकीकृत समाजवादीका शाही निर्वाचित

    काठमाडौं । बाजुराको प्रदेश सभा निर्वाचन क्षेत्र १ बाट नेकपा एकीकृत समाजवादीका नरेशकुमार शाही निर्वाचित...

    एमालेसँग मिलेर सरकार बनाउने विकल्प माओवादीमा खुला

    काठमाडौं । नेकपा माओवादी केन्द्रमा नयाँ सरकार गठन जोसुकैसँग मिलेर गर्न सकिने विकल्पलाई खुल्ला राख्नेबारे...

    स्याङ्जा २ मा कांग्रेसका धनराज गुरुङको जित निश्चित

    काठमाडौं । स्याङ्जा २ बाट प्रतिनिधिसभा सदस्यमा नेपाली कांग्रेसका उम्मेदवार धनराज गुरुङ जित निश्चित भएको...

    किसान श्रेष्ठ र जितेन्द्र सोनललाई २०५ किलोको माला

    वीरगञ्ज । बाराको परवानीपुरमा स्थानीयले नवनिर्वाचित प्रतिनिधि सभा सदस्य किसान श्रेष्ठ र प्रदेश सभा सदस्य...

    Loading…

    फेसबुकमा हामीलाई लाईक गरौं