पोखरा । नेपाली काँग्रेस कास्कीमा क्रियाशील सदस्यको संख्या १९ हजार एक सय ४२ पुगेको छ ।यसपटक १० हजार पाँच सय २० जनाले क्रियाशील सदस्यता नवीकरण र ८ हजार ६ सय २२ जनाले नयाँ सदस्यता लिएको प्रवत्ता नवीन सिग्देलले जानकारी दिनुभयो ।
कास्की काँग्रेसका सभापति कृष्ण केसीको अध्यक्षतामा शुक्रबार बसेको बैंठकले वडा, प्रदेश, क्षेत्र हुँदै जिल्लामा सिफारिस भएका क्रियाशील सदस्य अनुमोदन गरी केन्द्रमा पठाउने निर्णय गरेको प्रवक्ता सिग्देलको भनाइ छ । कास्कीमा क्रियाशील सदस्यताका बारेमा कुनै पनि उजुरी परेको थिएन ।
बैठकले सरकारले कालीगण्डकी डाइभर्सन सम्बन्धी गरेको निर्णय अव्यवहारिक भएको ठहर गर्दै खेद प्रकट गरेको छ ।बढीपहिरोका कारण कास्की लगायतका क्षेत्रमा पुगेको जनधनको क्षतिप्रति दुःख गर्दै त्यसतर्फ सरकारको ध्यानाकर्षण गराएको छ ।
बैठकले काँग्रेस नेतृत्वमा गण्डकी प्रदेश सरकार बनेकोमा बधाई ज्ञापन गर्दै सफल कार्यकालको शुभकामना व्यक्त गरेको छ ।त्यस्तै बैठकले काँग्रेस नेता रामजी कुँवरको शिघ्र स्वास्थ्य लाभको कामना गरेको छ ।
